ප්‍රසාදයක දිවිසැරිය

 

 

පොතුවිල් දොළ අසළ ඇති කුඩා අඩි පාරක දිනක් මිනිසෙකු තම මිත්‍රයෙකු විසින් ලබාදුන් ගෝන මස් කැබැල්ලක් රැගෙන ගමනක් පිටත්ව යයි.මෙම අඩි පාර දිගේ යන මිනිසාට ලොකු ඉඹුල් ගසක් හමුවන අතර එම ඉඹුල් ගසෙහි මිනිසෙක් එල්ලී මැරී සිටිනු මෙම මිනිසා දකීයි. තමන් අතෙහි වූ ගෝන මස් කැබැල්ල එම ගසේ එල්ලන මිනිසා ඉන් ඉදිරියට ඇදී යයි. එදා සිට ඒ මිනිසා පමණක් නොව සෑම මිනිසෙකුම මේ ගමට මස්ඉඹුල යැයි ව්‍යවහාර කරන්නට යෙදුනි. එලෙස නාමය ලත් මස්ඉඹුල ගම අද වන විට ලෝක ප්‍රසිද්ධියට පත්ව ඇත්තේ මහින්ද ප්‍රසාද් මස්ඉඹුල නම් නම් සොඳුරු නිර්මාණ නිර්මාණවේදියාගේ නිර්මාණ හේතු කරගනිමිනි.රත්නපුර දිස්ත්‍රික්කයේ ගොඩකවෙල නම් නම් හද්දා පිටිසර ප්‍රදේශයේ මස්ඉඹුල නම් ග්‍රාමයේ උපත ලැබූ පවුලේ දෙවනියා වූ මහින්ද ප්‍රසාද් මස්ඉඹුලගේ පියා සාම්ප්‍රදායික ගොවියෙකු වූ සිරිපාල නැමැත්තාය.කරුණාව ගලා ගිය මව කරුණාවතී වූ අතර ඔහුට වැඩිමහල් සොයුරියක් ද විය.ශිෂ්‍යත්ව කඩයිමත්, අධ්‍යයන පොදු සහතික පත්‍ර සාමාන්‍ය පෙළ විභාගය සහ අධ්‍යයන පොදු  සහතික පත්‍ර උසස් පෙළ විභාගයත් අසමත් මස්ඉඹුල  එතරම් දක්ෂතා දැක්වූ සිසුවෙකු නොවීය.උනන්දුව කැපවීම අධිෂ්ඨානය තුළින් තම ජීවිතය සරි කරගත් පරමාදර්ශී පුද්ගලයකු වශයෙන් ඔහු හැඳින්විය හැක්කේ එබැවිනි.කාව්‍යකරණය සහ නවකථාකරණයෙහි ලා පවුල තුළින් ලත් ආභාසයක් නොවුනද පියා ගමෙහි පිරිත් මණ්ඩප, මගුල් පෝරු ආදී කලා කටයුතු වල නිරත වූ කලාවේදියෙකි.පියා පසුපස යමින් කුඩා කල සිටම ඔහුගේ කලා කුසලතාවයන්ට රුකුලක් වන්නට මස්ඉඹුල නිර්මාණවේදියා කටයුතු කරනු ලැබීය.ඔහුගේ ජීවිතයේ මිහිරිතම පරිච්ඡේදය වූයේ සිය මිත්තනියන් ය.කිසිදින අකුරු නූගත් හේ තමා පාරම්පරිකව ලත් දැනුමින්, අවබෝධයන්ගෙන් ඔහුව සුපෝෂිත කළාය.ඇයට කටපාඩම් තිබූ කවි ගණන සියයකටත් වැඩිය.ගැමි කතා කීමේ කලාවේ උපන් හපනියක් වූ ඇය තමන් ලත් සාම්ප්‍රදායික දැනුම තම මුණුපුරාට මනාව කාවද්දා දෙන ලදී.පවුල් පරිසරය ආර්ථික වශයෙන් ඉතා උසස් මට්ටමක නොතිබුණු නිසා අධ්‍යාපනය ලබන සමයේත්,අධ්‍යාපනය නිම කළ පසුත් පවුලට රුකුල් දෙන රැකියාවන්හි නිරත වන්නට ඔහුට සිදු විය.ඒ අතරවාරයේ තම සිතෙහි උපන් සිහිනය වූ නිර්මාණකරුවකු වීමේ සිහිනය සැබෑවක් කර ගැනීම සඳහා නිරන්තරයෙන් ඔහු විසින් තැපැල්පත් කොළඹ විවිධ ටෙලි නාට්‍ය නිර්මාණ, සිනමා නිර්මාණ වේදීන් වෙත යොමු කරන්නට කටයුතු කළේය. එලෙස යවන ලද තැපැල්පත් අතර වූ එක් පැල්පතකට රෝයි ද සිල්වා නම් ජේෂ්ඨ කලාවේදියා විසින් එවනු ලැබූ පිළිතුරු තැපැල්පත ඔහු සන්තකයේ තවමත් සුරැකිව පවතී.එහි සඳහන්ව තිබුණේ,

                            "ඔබ තවමත් කුඩා දරුවෙක් තවදුරටත් ඉගෙනගෙන ක්ෂේත්‍රයට පිවිසෙන්න."යනුවෙනි.

වර්ෂ 1999 වසරේ දී මොහු විසින් තමන් යොමුකළ තැපැල් පතකට ලැබුණු පිළිතුරක් මත පිහිටා සාමාන්‍ය සේවකයෙකු වශයෙන් ටෙලි නාට්‍යයක් සඳහා සිය දායකත්වය ලබා දෙන ලදී.වයස අවුරුදු 19 ක් වැනි ඉතා කුඩා වයසකදී නුහුරු නුපුරුදු කොළඹට තම දරුවා යොමු කිරීමට නිවැසියන් කිසිසේත්ම එකඟ වූයේ නැත.එනමුත් තම සිහිනයන් පසුපස ලුහුබැඳ යාමේ බලවත් ආශාව හේතු කරගනිමින් මස්ඉඹුලයන් අභියෝගය භාර ගෙන සාමාන්‍ය සේවකයෙකු වශයෙන් මෙම ටෙලිනාට්‍යය සඳහා සිය දායකත්වය ලබාදීමට කොළඹ පුරවරට ආගමනය වීම සිදුවිය.එය කෙතෙක් දුෂ්කර ද යත් ඔහු සමග සාමාන්‍ය සේවකයන් වශයෙන් මෙම නාට්‍යයට දායකත්වය සැපයීමට පැමිණි අනෙක් දෙදෙනාම රැකියාව අත්හැර දමා ගිය ද තම සිහිනය වෙනුවෙන් බොහෝ දේ කැප කර තමන්ට ලැබූ අවස්ථාවෙන් උපරිම ප්‍රයෝජන ලබා ගන්නට කතානායකයා වෙහෙසුණි.

සාමාන්‍ය සේවකයෙකු වශයෙන් ටෙලිනාට්‍ය කලාවට එකතු වූ ඔහු පසුව ක්‍රමක්‍රමයෙන් පියවරෙන් පියවර බොහෝ අත්දැකීම් ලබා ගනිමින් පුහුණු ශිල්පියෙක්, සහය කලා අධ්‍යක්ෂවරයෙක් , දෙවන සහ තුන්වන සහාය අධ්‍යක්ෂවරයෙක් , නිෂ්පාදන කළමනාකරුවෙක් , තිරපිටපත් රචකයෙක් දක්වා පැමිණි ගමන් මඟ රෝස මල් යහනාවක් නොවේ.එකී විවිධ වෘත්තීමය ක්ෂේත්‍රයෙන් යටතේ අසමසම පරිචයක් ලත් ඔහු ප්‍රායෝගිකව ශාස්ත්‍රීය ශික්ෂණයක් ලද්දේය.

ඔහුගේ නිර්මාණ දිවියේ "ස්වයංජාත" ටෙලිනාට්‍ය හැරවුම් ලක්ෂයකි.පෞද්ගලිකව තමා බොහෝ ප්‍රිය කරන සාහිත්‍ය කෘතියක් ඇසුරින් සුදත් රෝහණයන්ගේ අධ්‍යක්ෂණයෙන් නිර්මාණය වූ මෙම  ටෙලිනාට්‍යයේ ප්‍රධාන සහාය අධ්‍යක්ෂවරයා වශයෙන් ඔහු කටයුතු කරනු ලැබීය.  දිනකට ශිල්පීන් 120-130ත් අතර ප්‍රමාණයක් යොදා ගනිමින් දර්ශන තල ගණනාවක රූගත කිරීම් සිදු කළ අති දැවැන්ත නිර්මාණයක් වශයෙන් මෙම නිර්මාණය පෙන්වා දිය හැක.සෝමා ටී පෙරේරා මහත්මියගේ "ඉර හඳ යට" නවකතාව පාදක කර ගනිමින් එරංග සේනාරත්නයන් විසින් අධ්‍යක්ෂණය කළ "අහසින් වැටුනු ගැහැනියක්" තිර පිටපත මහින්ද ප්‍රසාද් මස්ඉඹුල මහතාගේ කුළුදුල් තිර පිටපතයි.සුදත් රෝහණයන් විසින් අධ්‍යක්ෂණය කළ ගිරිකුල නම් ටෙලි නාට්‍යයේ තේමා ගීතයේ රචකයා වූයේ මහින්ද ප්‍රසාද් මස්ඉඹුලයන් ය.එම තේමා ගීතය OCIC සහ සුමති සම්මාන හිමි කර ගැනීමට සමත් විය.ගීත රචනයට ප්‍රමුඛතාව දෙන ඔහු කවියට වඩා ගීතය ජනතාව අතරට ගෙන යා හැකි බව ප්‍රකාශ කරයි.අදටත් යම් ටෙලි හෝ සිනමා නිර්මාණයක් සඳහා ගීත රචනයේ දී රචනයේදී සම්පූර්ණ තිරපිටපත ම කියවා එම නිර්මාණයට වඩාත් උචිත පරිදි අදාළ තේමා ගීතය රචනා කරන්නට ඔහු කටයුතු කරයි. වඩාත් උසස් නිර්මාණ ජනගත කිරීම තමන්ගේ පරම අභිලාෂය වන බව ඒ ඔස්සේ ඔහු ප්‍රකට කරයි.

ටෙලිනාට්‍යකරනයෙන් කලාවට පිවිසි ඔහු තමන්ගේ නවකතා සහ කාව්‍ය ජීවිතය අරඹන්නේ ඉන් අනතුරුවයි.ඔහුගේ පළමු සාහිත්‍යය නිර්මාණය වූයේ 2010දී සුරචිත "සෙංකොට්ටං" ප්‍රබන්ධ නවකතාවයි.ඉන් අනතුරුව ඔහු විසින් "මාණික්කාවත" සහ "අපොයියාව" යන නවකතාත්, "හිරුත් හිම පියල්ලක", "ඇහිපියන් ඇහැරිලා" වැනි කාව්‍ය ග්‍රන්ථත් නිර්මාණය කරන ලදී.මේ සියලු සාහිත්‍යය නිර්මාණයන් දේශීය වශයෙන් විවිධ සම්මානයන්ට පාත්‍ර වූයේ ඔහු සතු නිසඟ කලා කුසලතාවය ප්‍රතිභාන්විත කරමිනි.

සාහිත්‍යකරුවෙකු වීමට පූර්වයෙන් වසර පහළොවක් පමණ ටෙලි නාට්‍ය ක්ෂේත්‍රය තුළ කටයුතු කරමින් ලබාගත් අත්දැකීම් ද, තම මිත්තණිය වෙතින් තමාට දායාද වූ කාව්‍යකරණයට අදාළ ආභාෂයන් ද උපයෝගී කරගනිමින් සාමාන්‍ය ජීවිතයක සිට අසාමාන්‍ය ගමනක් ආ මේ අපූර්ව නිර්මාණවේදියා සැබැවින්ම ලක් සාහිත කෙතට නිම වූ අග්‍රගණ්‍ය ප්‍රසාදයකි.

📌 සටහන - සවිදු ඉරෝෂන්